अवैध देशी दारू साठ्यावर देवणी पोलिसांची छापेमारी; ३.३९ लाख रुपयांचा देशी दारू साठा जप्त

अवैध देशी दारू साठ्यावर देवणी पोलिसांची छापेमारी; ३.३९ लाख रुपयांचा देशी दारू साठा जप्त

लातूर : विधानसभा निवडणूक २०२४ च्या पार्श्वभूमीवर लातूर जिल्ह्यात अवैध धंद्यांविरोधात कठोर कारवाई सुरू आहे. पोलीस अधीक्षक सोमय मुंडे यांनी जिल्ह्यातील सर्व पोलीस ठाण्यांना अवैध धंद्यांविरोधात तत्काळ कार्यवाहीचे आदेश दिले आहेत. या आदेशानुसार अपर पोलीस अधीक्षक डॉ. अजय देवरे आणि निलंगा विभागाचे उपविभागीय पोलीस अधिकारी नितीन कटेकर यांच्या मार्गदर्शनाखाली देवणी पोलिसांनी मोठी कारवाई केली आहे.

देवणी पोलीस ठाण्याचे सहाय्यक पोलीस निरीक्षक माणिक डोके यांच्या नेतृत्वात एक विशेष पथक तयार करण्यात आले. या पथकाला गोपनीय माहिती मिळाल्यानंतर मौजे वलांडी शिवारातील एका शेतातील पत्र्याच्या शेडवर छापा टाकण्यात आला. या कारवाईत, दत्तात्रय ज्योतीराम दुबे (राहणार वलांडी, तालुका देवणी) याने अवैधरीत्या विक्रीसाठी साठवून ठेवलेला देशी दारूचा ३ लाख ३९ हजार ५०० रुपयांचा साठा जप्त करण्यात आला. सुमारे १०० बॉक्स दारूसह इतर साहित्य या छाप्यात हस्तगत करण्यात आले आहे.

याप्रकरणी पोलीस उपनिरीक्षक प्रदीप गोंड यांच्या तक्रारीवरून देवणी पोलीस ठाण्यात गुन्हा नोंदवण्यात आला आहे. ही कारवाई वरिष्ठ अधिकाऱ्यांच्या मार्गदर्शनाखाली सहाय्यक पोलीस निरीक्षक माणिक डोके, पोलीस उपनिरीक्षक प्रदीप गोंड, सहाय्यक पोलीस उपनिरीक्षक कोडामंगले आणि पोलीस अंमलदार संजय बोईने, देविदास कीवंडे, योगेश गिरी यांनी केली. या प्रकारामुळे देवणी परिसरात अवैध व्यवसायांवर पोलीस प्रशासनाच्या धडक कारवाईचे चांगलेच पडसाद उमटले आहेत. प्रशासनाकडून अशा प्रकारच्या कारवाया भविष्यातही सुरू राहणार असल्याचे संकेत देण्यात आले आहेत.

देवणी पोलीस ठाण्यात कार्यरत सहाय्यक पोलीस निरीक्षक माणिक डोके यांनी त्यांच्या कार्यकुशलतेने व नेतृत्वाने अनेक यशस्वी कारवाया केल्या आहेत. नुकत्याच झालेल्या एका छापेमारीत त्यांनी ३.३९ लाख रुपयांचा अवैध देशी दारूचा साठा जप्त करून गुन्हेगारीविरोधातील कठोर भूमिका सिध्द केली आहे.  सहाय्यक पोलीस निरीक्षक म्हणून काम करताना, तपासात बारकाईने लक्ष घालणे, सहकाऱ्यांना योग्य ते मार्गदर्शन करणे, तसेच नागरिकांशी संवाद साधून त्यांचा विश्वास जिंकणे यांसारख्या भूमिकाही पार पाडाव्या लागतात. देवणी ठाण्याचे सहाय्यक पोलीस निरीक्षक म्हणून माणिक डोके हे त्यांच्या उत्कृष्ट कार्यक्षमतेसाठी ओळखले जातात.