लातूर जिल्हा क्रीडा संकुल येथे 16 एप्रिल पासून विविध खेळांचे मोफत उन्हाळी क्रीडा प्रशिक्षण शिबीर

लातूर जिल्हा क्रीडा संकुल येथे 16 एप्रिल पासून विविध खेळांचे मोफत उन्हाळी क्रीडा प्रशिक्षण शिबीर

15 एप्रिलपर्यंत नाव नोंदणी करण्याचे आवाहन

लातूर : क्रीडा व युवक सेवा संचालनालय अंतर्गत लातूर जिल्हा क्रीडा अधिकारी कार्यालय आणि लातूर जिल्हा क्रिडा प्रशिक्षण केंद्राच्यावतीने क्रीडा संघटना, अकॅडमीमार्फत 16 ते 25 एप्रिल, 2024 या कालावधीत विविध खेळांचे सर्व वयोगटातील विद्यार्थी खेळाडूंसाहती मोफत क्रीडा प्रशिक्षण शिबिराचे आयोजन करण्यात आले आहे. हे शिबीर सन 2024-2025 च्या स्पर्धेच्या पूर्वतयारी लक्षात घेवून घेण्यात येणार आहे. तसेच शिबीरामध्ये शासनाचे क्रीडा मार्गदर्शक तसेच संघटना, इतर अकॅडमीचे तज्ज्ञ क्रीडा मार्गदर्शक, राष्ट्रीय, आंतरराष्ट्रीय खेळाडू व तज्ज्ञ पदाधिकारी यांच्याद्वारा खेळनिहाय तंत्रशुध्द प्रशिक्षण देण्यात येणार आहे. जिल्हा क्रीडा संकुल येथे क्रिकेट,खो-खो, कुस्ती,मैदानी,रायफलशुटींग, लॉन

टेनिस, जिम्नॅस्टिक्स, मल्लखांब, योगा, व्हॉलीबॉल, फुटबॉल, बॅडमिंटन, बॉक्सिंग, ज्युदो, कराटे, स्केटींग, बेसबॉल, सॉफ्टबॉल इत्यादी खेळांचे प्रशिक्षण देण्यात येणार आहे. तसेच अहमदपूर येथे तलवारबाजी, सायकलिंग, शुटिंग बॉल, रग्बी, आट्यापाट्या, कबड्डी, बास्केटबॉल, हॅण्डबॉल, फ्लोअर बॉल इत्यादी खेळांचे, उदगीर येथे फुटबॉल, व्हॉलीबॉल, तर मुरुड येथे वुशु., व्हॉलीबॉल, बॉक्सिंग, क्रिकेट, बॅडमिंटन इत्यादी खेळांचे प्रशिक्षण देण्यात येणार आहे. प्रशिक्षण शिबीर नि:शुल्क असून विद्यार्थी, खेळाडू यांनी जिल्हा क्रीडा अधिकारी कार्यालय, लातूर येथे क्रीडा मार्गदर्शक जयराज मुंडे (भ्रमणध्वनी क्र. 8275273917) आणि चंद्रकांत लोदगेकर (भ्रमणध्वनी क्र. 9834988239) यांच्याकडे 15 एप्रिल, 2024 पर्यंत आपली नाव नोंदणी करावी. जिल्ह्यातील विविध शाळेतील क्रीडा शिक्षक, मुख्याध्यापक व पालक यांनी जास्तीत जास्त मुलांना या उन्हाळी प्रशिक्षण शिबीराचा लाभ घेण्यासाठी प्रोत्साहित करावे, असे आवाहन जिल्हा क्रिडा अधिकारी जगन्नाथ लकडे यांनी केले आहे.