कोरोना विषाणूंच्या संकटामुळे हिरेमठ संस्थांनचा वार्षिकोत्सव रद्द

कोरोना विषाणूंच्या संकटामुळे हिरेमठ संस्थांनचा वार्षिकोत्सव रद्द

औसा:(प्रतिनिधी /सय्यद नदीम) हिरेमठ संस्थांनच्या माध्यमातून प्रतिवर्षी अखंड शिवनाम सप्ताह, इष्टलिंग महापूजा आणि शिवदीक्षा सोहळ्याची ८० वर्षांपासून अखंड परंपरा लिंगैक्य गुरु निरंजन शिवाचार्य महाराज यांनी घालून दिली आहे. परंतु यावर्षी कोरोना विषाणूंच्या संकटामुळे संपूर्ण जगभर पसरलेल्या महामारीमुळे सर्वजण भयभीत झाले आहेत. दि. २२ जून ते १७ जुलै २०२० पर्यंत हिरेमठ संस्थांनचा आषाढमासी वार्षिक उत्सव कोरोनाच्या संकटामुळे रद्द करण्यात आला असून या वर्षी हा उत्सव गर्दी टाळण्यासाठी उत्यंत साध्या पद्धतीने करण्यात येणार आहे. संस्थांनचे डॉ श्री १०८ शांतवीरलिंग शिवाचार्य महाराज आणि पीठाधिपती ष. ब्र.१०८ श्री निरंजन शिवाचार्य महाराज यांच्या मार्गदर्शनाखाली या वर्षीच्या आषाढमासी ८० व्या वार्षिक उत्सवाचे दैनंदिन कार्यक्रम संस्थांनमध्ये मोजक्या भक्तगणा समवेत होतील. हिरेमठ संस्थांनचे लिंगैक्य गुरु निरंजन शिवाचार्य महाराज यांचे सदैव आशीर्वाद सद्भक्तांच्या पाठीशी आहेत. ईश्वरच सर्वांचा तारणहार आहे. त्यामुळे कोरोना विषाणूंचा प्रादुर्भाव रोखण्यासाठी संस्थांनमध्ये गर्दी होऊ नये म्हणून, भक्त - शिष्यगणांनी आपापल्या घरीच श्रद्धापूर्वक व भक्तिभावाने लिं. गुरु निरंजन शिवाचार्य (बाबारी) महाराजांच्या प्रतिमेचे पूजन आणि स्मरण करून गुरुपौर्णिमेच्या निमित्ताने दि. ५ जुलै रोजी आशीर्वाद घ्यावेत. प्रत्येक सद्भक्तांनी आपल्या परिवाराच्या आरोग्याची काळजी घेतली तरच धर्म, अर्थ, साधना उत्तम प्रकारे प्राप्त करू शकतो. आरोग्य उत्तम तर सर्वकाही उत्तम हा संदेश मनात ठेवून श्रीमद् काशीजगद्गुरु यांचा ' जन्म हा अखेरचा ' ग्रंथाचे वाचन नित्यनेमाने श्रद्धापूर्वक करावे, तसेच इष्टलिंग महापूजा आणि शिवदीक्षा साठी हिरेमठ संस्थांनमध्ये न येता आपल्या घरी संपन्न करावी, असे आवाहन वीरशैव समाजाचे अध्यक्ष सुभाषप्पा मुक्ता, उपाध्यक्ष विजयकुमार मिटकरी, अॅड एस एस पाटील अलमलकर, सुरेशप्पा ठेसे, प्रा. युवराज हलकुडे, अॅड. विजय आष्टुरे, राजाभाऊ नागराळे, शिवशंकर सुतार, प्रा. शिवरुद्र् मुर्गे, आणि वीरशैव युवा संघटना औसा यांनी केले आहे.